काठमाडाैं। अमाद डियालोले खेलको ९०औं मिनेटमा निर्णायक गोल गरेपछि आइभोरी कोस्टले विश्वकप २०२६ अन्तर्गत समूह चरणको खेलमा इक्वेडरलाई १–० ले पराजित गरेको छ।
लिन्कन फाइनान्सियल फिल्डमा सोमबार बिहान सम्पन्न प्रतिस्पर्धात्मक खेलमा दुवै टोलीले गोलका लागि संघर्ष गरे पनि अन्तिम समयमा म्यानचेस्टर युनाइटेडका विंगर डियालोले टोलीलाई जित दिलाए।
दोस्रो हाफमा मैदान प्रवेश गरेका डियालोले पेनाल्टी क्षेत्रको ठीक बाहिरबाट गरेको बायाँ खुट्टाको प्रहारले इक्वेडरका गोलकिपर हेर्नान गालिन्डेजलाई पराजित गरेको थियो।
उक्त गोलको अवसर सिर्जना गर्न विल्फ्रिड सिंगोले दायाँ विंगबाट उत्कृष्ट दौड लगाउँदै महत्त्वपूर्ण पास दिएका थिए। सन् २०१४ पछि पहिलो पटक विश्वकप खेलिरहेको आइभोरी कोस्टका लागि यो जित ऐतिहासिक छ। टोलीले यससँगै पहिलो पटक नकआउट चरण पुग्ने सम्भावनालाई बलियो बनाएको छ।
अर्कोतर्फ, इक्वेडरको १९ खेल लामो अपराजित यात्रा समाप्त भएको छ। टोलीले सेप्टेम्बर २०२४ मा ब्राजिलसँग १–० ले पराजित भएयता हार बेहोरेको थिएन।
खेलभर दुवै टोलीले गोलका थुप्रै अवसर सिर्जना गरे। आइभोरी कोस्टका एलिये वाहीले ५२औं मिनेटमा हानेको प्रहार क्रसबारमा लागेको थियो। त्यस्तै, पहिलो हाफमा इक्वेडरका जोन येबोआह र निल्सन आङ्गुलोका प्रहार पनि क्रसबारमा ठोक्किएका थिए।
६८ हजारभन्दा बढी दर्शक उपस्थित खेलमा अधिकांश समर्थक इक्वेडरको पक्षमा थिए। पहेँलो जर्सीमा सजिएका समर्थकहरूले घरेलु मैदानजस्तै वातावरण सिर्जना गरेका थिए।
डियालोको गोलअघि इक्वेडर खेलमा प्रभावशाली देखिएको थियो। दोस्रो हाफमा गोन्जालो प्लाटाले करिब २५ यार्ड टाढाबाट गरेको शक्तिशाली प्रहारलाई आइभोरी कोस्टका गोलकिपर याहिया फोफानाले उत्कृष्ट बचाउ गरेका थिए।
आइभोरी कोस्टका लागि यान डियोमान्डेले पनि प्रभावशाली प्रदर्शन गरे। लाइपजिगका आक्रमणकारी डियोमान्डेले दायाँ विंगबाट लगातार अवसर सिर्जना गर्दै विपक्षी रक्षापंक्तिलाई दबाबमा राखेका थिए।
विश्वकप छनोटमा १० खेलमध्ये ८ जित र २ बराबरी खेल्दै कुनै गोल नखाएको आइभोरी कोस्टले अब जुन २० मा चार पटकको विश्व च्याम्पियन जर्मनीसँग खेल्नेछ। जर्मनीले आइतबार नै कुरासाओलाई ७–१ ले पराजित गरेको थियो। त्यसैगरी, इक्वेडरले आफ्नो दोस्रो खेलमा कुरासाओको सामना गर्नेछ।
तपाईको प्रतिक्रिया !!!
